Shayxontohur dahasidagi mahalla. Orqako‘cha, Dukchi, Zanjirlik, Pushtibog‘, Quduqboshi mahalallari bilan chegaradosh bo‘lgan. Mahallada 160 ga yaqin xonadon yashagan. Aholisi asosan o‘zbeklar bo‘lib, ko‘pchiligi to‘qimachilik bilan shug‘ullangan, shuning uchun Padarkushni “bo‘zchi mahalla” deb ham atashgan. Shahar tashqarisidagi yerlarida dehqonchilik va bog‘dorchilik bilan ham shug‘ullanilgan. Maktab, 2 masjid, novvoyxona, qog‘oz tayyorlash ustaxonasi, baqqollik do‘konlari, 2 juvozxona bo‘lgan (XX asr boshi). Hozir territoriyasida Markaz-13 mikrorayoni joylashgan. 1992-yilgi Toshkent ensiklopediyasidan

Shayxontohur dahasidagi qadimgi mahalla. Turk, Ila, Tojik mahallalari bilan chegaradosh bo‘lgan. Bir chekkasi Yangi shaharga tutashgan. Qariyb 130 xonadon yashagan. Aholisi 1830-yillarda Qo‘qon xoni tomonidan, asosan, Qash­qardan ko‘chirib keltirilgan qash­qarliklar (nomi shundan), bir qismi o‘zbeklar bo‘lgan; savdo-sotiq, shahar tash­qarisidagi yerlari (Oqqo‘rg‘on, Bo‘z, Yalang‘och va boshqa mavzelar)da deh­qonchilik va bog‘dorchilik bilan shug‘ullangan. Qashqarda 4 ta karvonsaroy, bozor, masjid, baqqollik do‘konlari bo‘lgan (20-asr boshi). Mahallaning shar­qiy chekkasida shahar darvozalaridan biri – Qash­qar darvozasi joylashgan edi. Chernyayev boshliq rus qo‘shinlari dastlab 1864-yil oktabrda Toshkentga shu tomondan hujum qilgan, lekin ko‘p talafot berib chekingan. 1865-yil Toshkentni rus qo‘shinlari bosib olgach, Qashqardagi egasiz qolgan xonadonlarga rus ofitserlari joylashib olgan. Qashqarda Hamza maktab ochib, bir muddat ishlagan edi. Mahallada ma’rifatchi va adabiyotshunos olim Miyonbuzruk Solihov (1892–1939) yashagan. Toshkent zilzilasi (1966) epitsentri Qashqarda bo‘lgan. Imoratlar qattiq shikastlangan. Qashqar o‘rnida Qashqar mahalla turar joy mavzei barpo etilgan. Shosh.uz